حصريا: العالم الليلة: إستقيموا يا عرب…. يرحمكم الله — على مسئوليتي الشخصية — هام جدًا
كتب /معالى اللواء د. م سامى محمود دنيا
وإحنا نايمين إمبارح السعودية كانت بتمر بليلة صعبة، اتعرضت فيها لقصف مكثف وغير مسبوق بالصواريخ والمسيرات الحوثية، إستهدف 7 مدن فى وقت واحد…
الهجمات دى تقريبًا كانت الأكبر منذ بداية الحرب، والحوثيين إستخدموا فيها صواريخ باليستية وفرط صوتية وطائرات مسيرة، وإستهدفوا العاصمة الرياض إللى حصل فيها بحسب وسائل الإعلام؛ خمس إنفجارات متتالية هزت المدينة كلها، نتيجة إعتراض الدفاعات الجوية للهجمات…
كل ده غير إستهداف قاعدة الأمير سلطان الجوية، ومحافظة الخرج، (وفى موقع يونانى كاتب إنه تم إستهداف قصر اليمامة نفسه لكن تم إعتراض الصاروخ، وده خبر غير مؤكد لحد دلوقتى ومحدش تانى كتب عنه)، بالإضافة لهجمات على مطار الملك خالد الدولى إللى بحسب مصادر إعلامية كان فى نشاط مكثف لسيارات الإطفاء فيه بعد الهجمات…
وبجانب الرياض، صفارات الإنذار إشتغلت كمان فى مناطق تانية زى الطائف، جازان، ينبع، أبها، خميس مشيط، ولأول مرة تم إستهداف جزر فرسان السعودية فى البحر الأحمر، بس تم إعتراض معظم الهجمات!
السؤال: طب ليه التصعيد ده كله؟
التصعيد العنيف ده جه مباشرة بعد ما الطيران الحربى السعودى خلال الساعات إللى قبلها نفذ ضربات جوية مكثفة شملت أكتر من 26 غارة على اليمن، وكان أبرزها عمليات فى قلب العاصمة اليمنية صنعاء إستهدفت قيادات حوثية بارزة وشخصيات على صلة بإيران، بالإضافة لغارات تانية على محيط منطقة البلق وأمريش فى مدينة مأرب، نجحت فى اسقاط خسائر كبيرة فى صفوف الحوثيين…
الضربات السعودية دى هى إللى دفعت الحوثيين للرد بالشكل ده، وردهم كان تصعيدى وأكبر بكتير من كل الضربات السابقة، وده مؤشر مش حلو خالص للأسف، لإنه معناه إن الدنيا بتشتعل أكتر وليس العكس…
بعد إللى حصل ده: مصادر صحفية وإعلامية قالت إن السعودية طلبت خلال الساعات إللى فاتت من وسطاء إبلاغ الحوثيين برغبتها فى الوصول لهدنة، لكن الحوثيين رفضوا الطلب ده تمامًا وما زالوا متمسكين بالإستمرار فى التصعيد… وده شىء مش كويس أبدًا بالنسبة للمملكة… طيب ليه؟
عشان المشكلة إللى ممكن تكون مش واخد بالك منها، هى إن السعودية عندها أهداف وبنية تحتية إستراتيجية تكلفتها عالية جدًا وممكن تتأثر بسهولة لو إتضربت، زى مصافى الوقود، والمحطات النفطية، ومحطات الكهرباء والمياه… لكن فى المقابل، الحوثيين معندهمش نفس الحجم من المنشآت الإقتصادية الضخمة إللى يخافوا عليها، وبالتالى تكلفة المعركة على السعودية بتكون أعلى بكتير جدًا… وبالفعل المملكة أعلنت إمبارح إنها هتوقف تصدير البترول لأوروبا بسبب الضغط إللى حصل على قدرتهم التصديرية للنفط بسبب الضربات! وإللى يأكدلك الكلام ده هو إن الحوثيين أعلنوا صراحة فى تصريح على لسان عضو المكتب السياسى فى جماعة أنصار الله "حزام الأسد"، إنهم شغالين على تحويل الحرب لمعركة صفرية، وعايزين يوصلوا لـ "تصفير إنتاج وتصدير النفط السعودى" وضرب المحركات الإقتصادية للمملكة!
فى النهاية، أتمنى من الله إن الطرفين يحتكموا للعقل، ويوقفوا الحرب دى ويوصلوا لإتفاق فى أسرع وقت ممكن، لأن إستمرارها بياكل فى إستقرار المنطقة كلها… ومش هيفيد أى حد غير أمريكا وإسرائيل إللى واخدين إللى بيحصل ده فرصة ذهبية للضغط والإبتزاز وتحقيق كل إللى نفسهم فيه على حساب أمن وإستقرار شعوب المنطقة.
تعليقى: يا عرب، الحروب لما بتبدأ نادرًا ما بتقف عند حدودها، وكل تصعيد جديد بيفتح باب لتصعيد أكبر. ربنا يحفظ السعودية واليمن وكل بلادنا وشعوبنا من نار الحرب، ويهدي الجميع إلى العقل والحوار وحقن الدماء… وبكرر تانى، أتمنى من الله إن الطرفين يحتكموا للعقل، ويوقفوا الحرب دى ويوصلوا لإتفاق فى أسرع وقت ممكن، لأن إستمرارها بياكل فى إستقرار المنطقة كلها... ومش هيفيد أى حد غير أمريكا وإسرائيل إللى واخدين إللى بيحصل ده فرصة ذهبية للضغط والإبتزاز وتحقيق كل إللى نفسهم فيه على حساب أمن وإستقرار شعوب المنطقة. إستقيموا يا عرب، يرحمكم الله.
تعليقات
إرسال تعليق